प्रधानमंत्री फसल विमा योजनेंतर्गत पुनर्रचित हवामानावर आधारित फळपिक विमा योजना अंबिया बहार 2022-23 चा शेतकरी बांधवांनी लाभ घ्यावा

 

अलिबाग, दि.20 (जिमाका):- आंबा व काजू बागायतदार शेतकऱ्यांना शासनाने आंबा व काजू पिकांसाठी पुनर्रचित हवामानावर आधारीत फळपिक विमा योजना सुरू केलेली आहे. रायगड जिल्ह्याकरीता भारतीय कृषी विमा कंपनी लिमिटेड, मुंबई ही कंपनी नेमलेली आहे. यांतर्गत नैसर्गिक आपत्ती व हवामानातील प्रतिकूल परिस्थितीमुळे फळपिकांचे नुकसान झाल्यास शेतकऱ्यांना विमा संरक्षण मिळते. अर्जदार तसेच बिगर कर्जदार शेतकऱ्यांसाठी अधिसूचित क्षेत्रातील अधिसूचित पिकांसाठी (आंबा व काजू) योजना एैच्छिक आहे. या योजनेंतर्गत जोखमीच्या बाबींमुळे होणाऱ्या पिकाच्या नुकसानीस नमूद कालावधी पर्यंत विमा संरक्षण दिले जाईल.

फळपिक:- काजू, समाविष्ट धोके:- 1) अवेळी पाऊस (विमा संरक्षण कालावधी- दि.1 डिसेंबर ते 28 फेब्रुवारी), विमा संरक्षित रक्कम:- रु.1 लाख, 2) कमी तापमान (विमा संरक्षण कालावधी- दि.1 डिसेंबर ते 28 फेब्रुवारी), विमा संरक्षित रक्कम:- रु.1 लाख, 3) गारपीट (विमा संरक्षण कालावधी- दि.1 जानेवारी ते 30 एप्रिल), विमा संरक्षित रक्कम:- रु.33 हजार 333, विमा हप्ता भरण्याची अंतिम तारीख:- 30 नोव्हेंबर 2022.

फळपिक:- आंबा, समाविष्ट धोके:- 1) अवेळी पाऊस (विमा संरक्षण कालावधी- दि.1 डिसेंबर ते 15 मे), विमा संरक्षित रक्कम:- रु.1 लाख 40 हजार, 2) कमी तापमान (विमा संरक्षण कालावधी- दि.1 जानेवारी ते 10 मार्च), विमा संरक्षित रक्कम:- रु.1 लाख 40 हजार, 3) जास्त तापमान (विमा संरक्षण कालावधी- दि.1 मार्च ते 15 मे), विमा संरक्षित रक्कम:- रु.1 लाख 40 हजार, 4) वेगाचा वारा (विमा संरक्षण कालावधी- दि.10 एप्रिल ते 15 मे), विमा संरक्षित रक्कम:- रु.1 लाख 40 हजार, 5) गारपीट (विमा संरक्षण कालावधी- दि.1 फेब्रुवारी ते 31 मे), विमा संरक्षित रक्कम:- रु.46 हजार 667, विमा हप्ता भरण्याची अंतिम तारीख:- 30 नोव्हेंबर 2022.

आंबा फळपिकाकरीता प्रति हेक्टर रक्कम रु.29 हजार 400 व काजू फळपिकाकरीता प्रति हेक्टर रक्कम रु.5 हजार इतका विमा हप्ता आहे. गारपीट या हवामान धोक्यापासून विमा संरक्षासाठी अतिरीक्त विमा हप्ता आंबा फळपिकाकरीता रक्कम रु.2 हजार 333 व काजू पिकाकरीता रक्कम रु.1 हजार 667 प्रति हेक्टर आहे. तरी जास्तीत जास्त शेतकऱ्यांनी यावर्षी योजनेत सहभागी व्हावे. सन 2021-22 मध्ये जिल्ह्यात एकूण 5 हजार 661 इतक्या शेतकऱ्यांनी रु.70.86 लाख इतका विमा हप्ता भरून 2469.89 हेक्टर क्षेत्राचा विमा उतरविला होता. त्यामध्ये सर्वच विमाधारक 5 हजार 669 शेतकऱ्यांना रक्कम रु.22.26 कोटी इतकी विमा भरपाई रक्कम मिळाली आहे.

विमा हप्ता भरण्यासाठी शेतकऱ्यांकरिता बँक सी.एस.सी. सेंटर किंवा पीक विमा पोर्टल (https://pmfby.gov.in) येथे सुविधा उपलब्ध असून अधिक माहितीकरिता तालुका कृषी अधिकारी कार्यालयाशी संपर्क करावा. तसेच आंबा व काजू पिकाकरीता विमा हप्ता भरण्याची अंतिम मुदत दि.30 नोव्हेंबर 2022 निश्चित असून आंबा व काजू उत्पादक शेतकऱ्यांनी लवकरात लवकर आपल्या पिकाचा विमा काढावा, असे आवाहन जिल्हा अधीक्षक कृषी अधिकारी उज्वला बाणखेले यांनी केले आहे.

00000