विधानसभा सार्वत्रिक निवडणूक-2024 मतदान केंद्रावर नियुक्त अधिकारी,कर्मचाऱ्यांना करता येणार सुविधा केंद्रावर टपाली मतदान

 

 

रायगड दि.12(जिमाका):-  विधानसभा सार्वत्रिक निवडणूक-2024 च्या अनुषंगाने मतदान केंद्रावर नियुक्त अधिकारी,कर्मचारी यांच्यासाठी दि.19 नोव्हेंबर 2024 रोजी साहित्य वितरणाच्या वेळी सकाळी 8.00 ते दुपारी 3.00 पर्यंत जिल्हा क्रीडा संकुल, नेहुली, ता.अलिबाग येथेही सुविधा केंद्रावर टपाली मतदान करता येणार आहे, अशी माहिती  नोडल ऑफीसर, टपाली मतदान समिती, 192-अलिबाग विधानसभा मतदारसंघ तथा तहसिलदार मुरुड रोहन शिंदे यांनी दिली आहे.

विधानसभा सार्वत्रिक निवडणूक-2024 च्या अनुषंगाने मा.निवडणूक आयोगाने निवडणूक कर्तव्यावर नियुक्त असलेल्या अधिकारी, कर्मचारी यांच्यासाठी टपालर मतदानाद्वारे मतदान करण्याची सुविधा उपलब्ध करुन दिली आहे. त्यानुषंगाने 192-अलिबाग विधानसभा मतदारसंघामध्ये मतदान केंद्रावर नियुक्त अधिकारी, कर्मचारी यांच्यासाठी दुसरे प्रशिक्षण दि.11 व दि.12 नोव्हेंबर 2024 रोजी आयोजित केलेल्या आर.सी.एफ.हॉल करुळ येथे एकूण 05 टपाली मतदान सुविधा केंद्र उभारण्यात आले होते.

पोलीस विभागातील अधिकारी व कर्मचारी यांच्यासाठी पोलीस अधीक्षक कार्यालयात दि.12 व दि.13 नोव्हेंबर 2024 रोजी 02 टपाली मतदान सुविधा केंद्र उभारण्यात येणार आहेत. तसेच आवश्यकता भासल्यास सदर ठिकाणी पुढील कालावधीतही ही सुविधा केंद्र कार्यरत ठेवण्यात येणार आहे.

तसेच 192-अलिबाग विधानसभा मतदारसंघामध्ये विविध पथकांमध्ये, समित्यांमध्ये नियुक्त अधिकारी, कर्मचारी व होमगार्ड यांच्यासाठी तहसिल कार्यालय, अलिबाग येथे दि.12 नोव्हेंबर 2024 रोजी 01 टपाली मतदान सुविधा केंद्र कार्यरत होते. तसेच आवश्यकता भासल्यास या ठिकाणी पुढील कालावधीतही हे सुविधा केंद्र कार्यरत ठेवण्यात येणार आहे.

००००००