शासनमान्य ग्रंथांची यादीकरिता सन-2024 कॅलेंडर वर्षातील प्रकाशित ग्रंथ पाठवावेत

 

रायगड-अलिबाग,दि.01(जिमाका) :- शासनमान्य ग्रंथांच्या यादीकरिता सन 2024 या कॅलेंडर वर्षात (1 जानेवारी ते 31 डिसेंबर, 2024) प्रकाशित झालेल्या मराठी भाषेतील ग्रंथांची निवड करण्यासाठी आणि शासनमान्य ग्रंथांच्या यादीत समावेश होण्याच्या दृष्टीने सन-2024 या कॅलेंडर वर्षात प्रकाशित झालेल्या व प्रथम आवृत्ती असलेल्या ग्रंथाची एक प्रत विनामूल्य (Comlimentry Copy) ग्रंथालय संचालक, ग्रंथालय संचालनालय, नगर भवन, टाऊन हॉल, मुंबई 01 यांच्याकडे दि. 15 ऑक्टोबर 2025 पर्यंत पाठविण्यात यावी, असे आवाहन ग्रंथालय संचालक अशोक गाडेकर यांनी केले आहे.

राज्यातील शासकीय व शासनमान्य सार्वजनिक ग्रंथालयांना राज्यात मराठी भाषेत प्रकाशित झालेल्या ग्रंथांची माहिती व खरेदी करिता मार्गदर्शक ठरावी म्हणून ग्रंथालय संचालनालयाकडून ग्रंथ निवड समितीच्या सदस्यांनी शिफारस केलेली वर्षनिहाय शासनमान्य ग्रंथांची यादी प्रकाशित करण्यात येते.

सन 2024 या वर्षात प्रकाशित झालेले ग्रंथ यापूर्वी संचालनालयास पाठविले असल्यास पुन्हा पाठविण्याची आवश्यकता नाही. हे निवेदन महाराष्ट्र शासनाच्या www.maharashtra.gov.in व ग्रंथालय संचालनालयाच्या www.dol.maharashtra.gov.in या संकेत स्थळावर ठेवण्यात आले आहे.

००००००