गुणवंत खेळाडू,क्रीडा मार्गदर्शक गुणवंत संघटक पुरस्कारासाठी अर्ज सादर करावेत
अलिबाग,जि. रायगड (जिमाका) दि.15:- क्रीडा व युवक सेवा संचालनालयामार्फत जिल्हा क्रीडा अधिकारी कार्यालय रायगडद्वारा जिल्ह्यातील उत्कृष्ट क्रीडापट्टू (महिला-एक, पुरुष-एक, दिव्यांग-एक खेळाडू) गुणवंत क्रीडा मार्गदर्शक एक व गुणवंत क्रीडा कार्यकर्ता-एक यांच्या कार्याचे,योगदानाचे मूल्यमापन होऊन त्यांचा गौरव व्हावा व क्रीडा क्षेत्रास प्रोत्साहन मिळावे या उद्देशाने जिल्हा क्रीडा पुरस्कार सन 2002 पासून देण्यात येतो. जिल्ह्यातील उत्कृष्ट खेळाडू, मार्गदर्शक व क्रीडा संघटक,कार्यकर्ता यांना हा पुरस्कार 26 जानेवारी रोजी देण्यात येणार आहे. सन 2017-18 च्या पुरस्कार वितरणासाठी या कार्यालयामार्फत अर्ज मागविण्यात येत आहे. पुरस्कारामध्ये प्रमाणपत्र,स्मृतिचिन्ह आणि रोख रुपये दहा हजार असे या पुरस्काराचे स्वरुप आहे. पुरस्काराकरिता 30 जून 2017 पर्यंतची कामगिरी,कार्य ग्राह्य धरले जाईल.
पुरस्काराचे निकष पुढीलप्रमाणे आहेत. गुणवंत खेळाडू : या पुरस्कराअंतर्गत तीन पुरस्काराचे वितरण करण्यात येणार असून एक महिला खेळाडू, एक पुरुष खेळाडू, एक दिव्यांग खेळाडू यांना सदरचा पुरस्कार देण्यात येणार आहे. संबधित जिल्ह्यामध्ये खेळाडूने लगतपूर्व पाच वर्षापैकी दोन वर्ष त्या जिल्ह्याचे मान्यताप्राप्त खेळांच्या अधिकृत स्पर्धामध्ये प्रतिनिधीत्व केले असले पाहिजे. खेळाडूंची मान्यताप्राप्त खेळाच्या अधिकृत राज्य,राष्ट्रीय अंजिक्यपद स्पर्धामधील पुरस्कार वर्षाच्या राज्य व राष्ट्रीय स्तरावरील वरिष्ठ, कनिष्ठ शालेय ग्रामीण व महिला (पंचायत युवा क्रीडा व खेळ अभियान) मधील राष्ट्रीय स्तरावरील कामगिरी लक्षात घेण्यात येईल. यापैकी उत्कृष्ट ठरणाऱ्या तीन वर्षाच्या कामगिरीचा विचार करण्यात येईल. खेळाडूने त्याचा अर्ज विहित नमुन्यात व विहित मुदतीत या कार्यालयात सादर करावा. खेळाडूने स्पर्धांच्या मूळ प्रमाणपत्रांच्या साक्षांकित प्रती सोबत सादर करणे आवश्यक राहील. खेळाडूंचा अर्ज अधिकृत जिल्हा संघटनेमार्फत शिफारस करुन सादर करणे आवश्यक राहील तथापि अपवादात्मक परिस्थितीत खेळाडू वैयक्तीकरित्या अर्ज करु शकतील. पुरस्कारासाठी अर्ज करणाऱ्या अर्जदाराचे महाराष्ट्रात सलग पंधरा वर्ष वास्तव्य असले पाहिजे.
क्रीडा मार्गदर्शक : पुरस्कारासाठी अर्ज करणाऱ्या अर्जदाराचे महाराष्ट्रात सलग पंधरा वर्ष वास्तव्य असले पाहिजे. संबंधित जिल्ह्यात क्रीडा मार्गदर्शक म्हणून सतत दहा वर्ष क्रीडा मार्गदर्शनाचे कार्य केले पाहिजे व त्याने वयाची तीस वर्ष पूर्ण केलेली असणे आवश्यक आहे. गुणांकनाकरिता त्या जिल्ह्यातील खेळाडूंची कामगिरी ग्राह्य धरली जाईल. एका जिल्ह्यामध्ये जिल्हा क्रीडा पुरस्कार प्राप्त करणारी व्यक्ती राज्यातील अन्य जिल्ह्यात जिल्हा पुरस्कारासाठी अर्ज करण्यास प्राप्त राहणार नाही. एकदा एका खेळामध्ये किंवा एका प्रवर्गामध्ये जिल्हा पुरस्कार प्राप्त केलेली व्यक्ती पुन्हा त्याच खेळात किंवा प्रवर्गात जिल्हा क्रीडा पुरस्काराकरिता अर्ज करण्यास पात्र असणार नाही.
गुणवंत संघटक : पुरस्कारासाठी अर्ज करणाऱ्या अर्जदाराचे महाराष्ट्रात सलग पंधरा वर्ष वास्तव्य असले पाहिजे. क्रीडा संघटक,कार्यकत्याने सतत दहा वर्ष महाराष्ट्रात क्रीडा विकासासाठी भरीव योगदान दिले असले पाहिजे व त्याने वयाची तीस वर्ष पूर्ण केलेली असणे आवश्यक आहे. गुणांकनाकरिता त्या जिल्ह्यातील कामगिरी ग्राह्य धरली जाईल.
विहित नमुन्यातील अर्ज, पुरस्काराच्या अटी व शर्ती इतर माहितीसाठी इच्छुकांनी व्यक्तीश: जिल्हा क्रीडा अधिकारी,कार्यालय रायगड येथे कार्यालयीन वेळेत अर्ज प्राप्त करुन दि.19पर्यंत सादर करावेत. मुदतीनंतर येणारे अर्ज स्विकारण्यात येणार नाही, असे आवाहन जिल्हा क्रीडा अधिकारी महादेव कसगावडे यांनी केले आहे.
०००००
Comments
Post a Comment