जिल्हा युवा पुरस्कारासाठी अर्ज मागविले

अलिबाग, जि. रायगड, दि.2 (जिमाका)-राज्याचे युवा धोरण – 2012 मधील शासन जिल्ह्यातील युवांनी केलेल्या समाजहिताच्या कार्याचा गौरव व्हावा व युवा विकासाचे कार्य करण्यासाठी त्यांना प्रोत्साहन मिळावे यासाठी जिल्हास्तर युवा पुरस्कार प्रतिवर्षी देण्यात येतो. या पुरस्कारासाठी जिल्ह्यातील इच्छूक संस्था व व्यक्तिंकडून मंगळवार दि.30 पर्यंत अर्ज मागविण्यात आले आहे, असे जिल्हा क्रीडा अधिकारी यांनी कळविले आहे.

पुरस्काराचे स्वरूप-

जिल्हास्तर युवा पुरस्कार- जिल्हास्तरावर एक युवक, एक युवती तसेच एक नोंदणीकृत संस्था यांना पुरस्कार देण्यात येईल. सदरचा पुरस्कार गौरवपत्र, सन्मानचिन्ह, रोख रक्कम रू. 10 हजार (प्रति युवक व युवतींसाठी), प्रति संस्थेसाठी गौरवपत्रए, सन्मानचिन्ह, रोख रक्कम- रु. 50 हजार अशा स्वरूपाचा असेल.

पात्रतेचे निकष –

·                    अर्जदार युवक/युवतींचे वय पुरस्कार वर्षातील 1 एप्रिल रोजी 13 वर्षे पूर्ण व 31 मार्च रोजी 35 वर्षे पर्यंत असावे.

·        जिल्हा पुरस्कारासाठी अर्ज करणाऱ्या अर्जदाराचे त्या जिल्ह्यात सलग 5 वर्ष वास्तव्य

·        पुरस्कार व्यक्ती अथवा संस्थेस विभागून दिला जाणार नाही.

·        पुरस्कार मरणोत्तर जाहीर करण्यात येणार नाही.

·        केलेल्या कार्याचे सबळ पुरावे अर्जासोबत जोडणे आवश्यक राहील. (उदा. वृत्तपत्र कात्रणे, प्रशस्तीपत्रे, चित्रफिती व फोटो इ.)

·        अर्जदार युवक व युवतीने पुरस्कार प्राप्त झाल्यानंतर किमान दोन वर्षे क्रियाशील कार्यरत राहणार असल्याचे हमीपत्र देणे आवश्यक राहील.

·        अर्जदार व्यक्तीचे कार्य हे स्वयंस्फूर्तीने केलेले असावे.

·        एका जिल्ह्यात पुरस्कार प्राप्त करणारी व्यक्ती राज्यातील अन्य जिल्ह्यात जिल्हा युवा पुरस्कारासाठी अर्ज करण्यास पात्र राहणार नाही.

·        केंद्र व राज्य शासनाच्या शासकीय व निमशासकीय कार्यालयातील अधिकारी/कर्मचारी तसेच विद्यापीठ अंतर्गत महाविद्यालयातील प्राध्यापक/कर्मचारी पुरस्कारासाठी पात्र राहणार नाहीत.

संस्थांसाठी पात्रता निकष –

·        पुसस्कार संस्थेस विभागून दिला जाणार नाही.

·        संस्थांनी केलेल्या कार्याचे सबळ पुरावे अर्जासोबत जोडणे आवश्यक राहील. (उदा. वृत्तपत्र कात्रणे, प्रशस्तीपत्रे, चित्रफिती व फोटो इ.)

·        अर्जदार संस्थेने पुरस्कार प्राप्त झाल्यानंतर किमान दोन वर्षे क्रियाशील कार्यरत राहणार असल्याचे हमीपत्र देणे आवश्यक राहील.

·        अर्जदार संस्था सार्वजनिक विश्वस्त अधिनियम 1860 किंवा मुंबई पब्लिक ट्रस्ट ॲक्ट 1950 नुसार पंजीबध्द असावी.

·        अर्जदार संस्था नोंदणी झाल्यानंतर किमान पाच वर्षे कार्यरत असणे आवश्यक आहे.

·        अर्जदार संस्थांचे कार्य हे स्वयंस्फुर्तीने केलेले असावे.

·        एक जिल्ह्यात पुरस्कार प्राप्त करणारी संस्था राज्यातील अन्य जिल्ह्यात जिल्हा युवा पुरस्कारासाठी अर्ज करण्यास पात्र राहणार नाही.

·        अर्जदार/संस्थेच्या सदस्यांचा पोलिस विभागाने प्रमाणित केलेला चारित्र्य दाखला (संबंधित परिक्षेत्रातील पोलिस स्टेशन) देणे आवश्यक राहील.

पुरस्कारासाठी मुल्यांकन-

·        युवा व युवा विकासाचे कार्य करणा-या संस्थांनी केलेले कार्य दि. 1 एप्रिल 2016 ते 31 मार्च 2019 या कालावधीतील गत तीन वर्षाची केलेली कामगिरी विचारात घेण्यात येईल.

·        युवा अथवा नोंदणीकृत संस्थांनी ग्रामीण व शहरी भागात केलेले सामाजिक कार्य.

·        राज्याचे साधन संपत्ती जतन संवर्धन तसेच राष्ट्र उभारणीच्या विकासासाठी सहाय्यभूत ठरणारे कार्य.

·        समाजातील दुर्बल घटक, अनुसुचित जाती, जमाती व जनताजी आदिवासी भाग इ. बाबतचे कार्य.

·        शिक्षण, प्रौढ शिक्षण, रोजगार, आरोग्य, पर्यावरण, सांस्कृतिक, कला, क्रीडा, मनोंरंजन, विज्ञान तंत्रज्ञान, व्यवसाय, महिला सक्षमीकरण, स्त्रीभ्रुण, व्यसनमुक्ती तसेच युवांच्या सर्वांगीण विकासासाठी केलेले कार्य.

·        राष्ट्रीय एकात्मतेस प्रोत्साहन देणारे कार्य.

·        नागरी गलिच्छ वस्ती सुधारणा, झोपडपट्टी,  आपत्ती व्यवस्थापन तसेच स्थानिक समस्या, महिला सक्षमीकरण इ. बाबत कार्य, साहस इ. बाबतचे कार्य.

जिल्हा पुरस्कारासाठी अधिक माहिती व लाभार्थीनी करावयाचा विहीत अर्जाचा नमुना जिल्हा क्रीडा अधिकारी कार्यालय, रायगड-अलिबाग येथे उपलब्ध आहे. इच्छुक युवांनी/युवा संस्थांनी आपले अर्ज  जिल्हा क्रीडा कार्यालयाकडे दि.30 पर्यंत सादर करावे,अधिक माहिती करिता जिल्हा क्रीडा अधिकारी कार्यालयाशी संपर्क साधावा असे आवाहन जिल्हा क्रीडा अधिकारी यांनी केले आहे.

00000