रायगड जिल्हयातील खाजगी आस्थापनांना ऑनलाईन रोजगार मेळाव्याकरीता रिक्तपदे अधिसूचित करण्याचे आवाहन

 

       अलिबाग,जि.रायगड दि.15 (जिमाका) :-  कोविड-19 मुळे जिल्ह्यातून कुशल/अकुशल कामगारांचे स्थलांतर झालेले आहे. त्यामुळे विविध कंपन्या/आस्थापनांमध्ये कुशल/अकुशल मनुष्यबळाची कमतरता भासत आहे. त्यासाठी जिल्हा कौशल्य विकास, रोजगार व उद्योजकता मार्गदर्शन केंद्र, रायगड-अलिबाग यांच्यामार्फत दि.21 ते 23 सप्टेंबर 2020 या कालावधीत सकाळी 10.00 ते सायंकाळी 06.00 या वेळेत ऑनलाईन रोजगार मेळावा आयोजित करण्यात आला आहे.

त्यासा़ठी या कार्यालयाच्या वेबपोर्टलवर नोंदणी केलेल्या आस्थापनांनी प्रथम त्यांना हव्या असलेल्या कुशल/अकुशल मनुष्यबळाची माहिती या विभागाच्या https://rojgar.mahaswayam.gov.in या वेबपोर्टलवर दि. 20 सप्टेंबर 2020 पर्यंत भरावी. ही माहिती भरताना प्रथम वेबपोर्टल सुरु करावे. त्यातील Employment-Employer (List a Job)-Employer Login या क्रमाने जाऊन आपल्या आस्थापनेचा युजर आयडी व पासवर्ड वापरुन आपल्या आस्थापनेची माहिती पहावी. त्यातील  Pandit Dindayal Upadhyay Job Fair  या ऑप्शनमधून दिसणाऱ्या रोजगार मेळाव्यांच्या यादीतील आपल्या जिल्हयाच्या नावावरील View Details-Job Details-Agree and Post Vacancy-Choose Vacancy-Add New Vacancy ऑप्शनवर क्ल‍िक केल्यानंतर रिक्त पदांची माहिती भरुन शेवटच्या पानावरील  Save Vacancy वर क्ल‍िक करावे.  त्यानंतर Manage Jobs and Responses या ऑप्शनमधील माहिती भरुन  उमेदवारांची यादी प्राप्त करावी. या यादीतील उमेदवारांना वेबपोर्टलद्वारे एसएमएस व पत्र पाठवून ऑनलाईन पध्दतीने व्ह‍िडीओ कॉल इत्यादी माध्यमातून मुलाखतीची कार्यवाही पूर्ण करुन  उमेदवारांना कळविण्यात यावे.

त्याचप्रमाणे ज्या आस्थापनांची यापूर्वी उपरोक्त वेबपोर्टलवर नोंदणी करण्यात आलेली नाही त्यांनी https://rojgar.mahaswayam.gov.in  या वेबपोर्टलवर Employment-Employer (List a Job)-Register या क्रमाने जाऊन नवीन नोंदणी करावी व आपल्याकडील रिक्त पदे वेबपोर्टलवर दि.20 सप्टेंबर 2020 पर्यंत नोटिफाईड करावीत. नवीन नोंदणी करताना या वेबपोर्टलवरील Employment-Employer (List a Job)-Register या ऑप्शन्सचा वापर करून आपल्या आस्थापनेची नोंदणी करावी. नवीन नोंदणी करताना आपले व्यवसाय सुरु करण्याबाबतचे प्रमाणपत्र (Incorporation Certificate) नोंदणीमध्ये अपलोड करणे आवश्यक आहे. आपल्या आस्थापनेची नवीन नोंदणी केल्यानंतर आपल्याकडील रिक्त पदे अधिसूचित करुन वेबपोर्टलवरील पुढील कार्यवाही करावी. वेबपोर्टलवर नवीन नोंदणी करणे व पदे अधिसूचित करणे या संदर्भात काही समस्या असल्यास या कार्यालयाचा दूरध्वनी क्रमांक 02141-222029 किंवा भ्रमणध्वनी क्र.9820452264 वर संपर्क साधावा, असे आवाहन जिल्हाधिकारी श्रीमती निधी चौधरी व जिल्हा कौशल्य विकास, रोजगार व उद्योजकता मार्गदर्शन केंद्राचे सहाय्यक आयुक्त शा. गि. पवार, यांनी केले आहे.

००००००