दि.31 जानेवारी पर्यंत अनधिकृत नळ कनेक्शन अधिकृत करुन घ्या

 

अलिबाग,जि.रायगड दि.24 (जिमाका) :- रायगड जिल्हा परिषदेमार्फत चालविण्यात येणाऱ्या प्रादेशिक नळ पाणीपुरवठा योजना व इतर योजनांमध्ये अनधिकृत नळ कनेक्शनधारकांची संख्या मोठ्या प्रमाणात असल्याचे निदर्शनास आले आहे. बऱ्याच ठिकाणी ग्रामीण पाणीपुरवठा विभागाची कोणत्याही प्रकारची परवानगी न घेता अथवा त्यासाठीची अनामत रक्कम व पाणीपट्टी न भरताच अनधिकृतरित्या नळ कनेक्शन घेऊन त्याचा वापर होत असल्याचे निदर्शनास आले आहे. ज्या लाभधारकांनी असे अनधिकृत नळ कनेक्शन घेतले आहेत, त्यांनी ते नळ कनेक्शन लोकवर्गणी व दंडाची रक्कम भरून अधिकृत करून घेण्याची किंवा तसे न केल्यास अनधिकृत नळ कनेक्शन तोडण्याची मोहीम जिल्हा परिषदेमार्फत राबविण्यात येत आहे.

    ज्या ठिकाणी अशी अनधिकृत नळ कनेक्शन घेण्यात आली आहेत, अशी अनधिकृत नळ कनेक्शन रक्कम रु.5000/- लोकवर्गणी मधून अनामत रक्कम आणि दंडाची रक्कम रु.1000/- दि.31 जानेवारी 2021 पर्यंत आपल्या क्षेत्र हद्दीतील उप अभियंता, ग्रामीण पाणीपुरवठा, रायगड जिल्हा परिषद, उपविभाग यांच्या कार्यालयात भरणा करावी व अनधिकृत नळ कनेक्शन अधिकृत करून घ्यावे. मात्र दि. 21 जानेवारी 2021 पर्यंत लोकवर्गणी रक्कम रु.5000/- व दंडाची रक्कम रु. 1000/- भरून नळ कनेक्शन अधिकृत करून न घेतल्यास अशी अनधिकृत नळ कनेक्शन तोडण्यात येतील, याबाबतची नोंद घेण्यात यावी,असे कार्यकारी अभियंता, ग्रामीण पाणीपुरवठा विभाग रायगड जिल्हा परिषद, अलिबाग यांनी कळविले आहे.

 

00000