पनवेल तालुक्यातील शिरढोण, सांगुर्ली तलाठी कार्यालय व मंडळ अधिकारी कार्यालय, कर्नाळा इमारतीच्या बांधकामासाठी मौजे शिरढोण येथील शासकीय जागा हस्तांतरित
अलिबाग,जि.रायगड,
दि.20 (जिमाका) :- पनवेल तालुक्यातील दुर्गम, डोंगराळ व आदिवासी बहुल भागात मंडळ अधिकारी
व तलाठी सजे यांना स्वत:चे कार्यालय उपलब्ध नसल्याने सामान्य नागरिकांना पुरेशा सोयी-सुविधा
उपलब्ध होत नव्हत्या. त्यामुळे पनवेल तालुक्यातील मंडळ अधिकारी कार्यालय, कर्नाळा व
तलाठी कार्यालय शिरढोण, सांगुर्ली या संबंधित
तलाठी/मंडळ अधिकारी, तलाठी सजा कार्यालयाच्या इमारतींच्या बांधकामासाठी शासकीय जमिनीची
मागणी केली होती.
शासकीय कार्यालयांची स्वत:ची इमारती असावी, जेणेकरुन
जनतेला योग्य सोयी-सुविधा गतीने पुरविता येतील, या उद्देशाने पालकमंत्री कु.आदिती तटकरे
यांनी या विषयाचा पाठपुरावा करुन जिल्हा प्रशासनास त्याप्रमाणे निर्देश दिले.
त्यानुषंगाने मौजे शिरढोण, ता.पनवेल येथील स.नं.39
क्षेत्र 2-39-00 हेक्टर आर पैकी क्षेत्र 0-07-10 हेक्टर आर ही शासकीय जमीन भोगाधिकार मूल्यरहित व महसूल मुक्त किंमतीने
मंडळ अधिकारी कार्यालय, कर्नाळा व तलाठी कार्यालय शिरढोण, सांगुर्ली करिता हस्तांतरित
करण्याविषयीचे आदेश जिल्हाधिकारी निधी चौधरी यांनी पारित केले आहेत.
या निर्णयामुळे पनवेल तालुक्यातील नागरिकांना शासकीय
सोयी-सुविधा मिळण्यासाठी निश्चितच गती प्राप्त होईल. शासकीय कार्यालयांसाठी स्वतःची
शासकीय वास्तू असावी, यासाठी गेल्या काही महिन्यांपासून पालकमंत्री कु.आदिती तटकरे
यांनी जातीने लक्ष देऊन अनेक शासकीय कार्यालयांचे प्रश्न मार्गी लावले आहेत.
000000
Comments
Post a Comment