कर्जत तालुक्यातील पशुवैद्यकीय दवाखाना श्रेणी-1 वैजनाथ करिता मौजे गौळवाडी येथील शासकीय जागा हस्तांतरित

 

 

अलिबाग, जि.रायगड दि.29 (जिमाका):- पालकमंत्री कु.आदिती तटकरे यांनी जिल्ह्यातील ग्रामीण स्तरापर्यंतच्या विविध शासकीय यंत्रणा बळकट करण्याचा ध्यास घेतला आहे. त्यापैकी पशुवैद्यकीय दवाखान्यांना प्रत्यक्ष कार्यान्वित करण्यासाठी आवश्यक असलेली कार्यवाहीदेखील प्रलंबित होती. मात्र पालकमंत्री कु.आदिती तटकरे यांनी या विषयाबाबत गांभीर्याने पावले उचलत पशुवैद्यकीय दवाखान्यांसाठी शासकीय जमिनी देण्याची कार्यवाही अत्यंत तत्परतेने सुरू केली आहे.

 त्याचबरोबर पशुवैद्यकीय दवाखान्यांसाठी असलेल्या जागांची योग्य निवड व पाहणी करून पशुवैद्यकीय दवाखाने कार्यान्वित करण्याच्या दृष्टीने तातडीने कार्यवाही सुरू करण्याबाबतीतही त्यांनी जिल्हा प्रशासनाला निर्देश दिले आहेत.

 या पार्श्वभूमीवर कर्जत तालुक्यातील येथील पशुवैद्यकीय दवाखाना श्रेणी-1 वैजनाथ या इमारतीच्या बांधकामासाठी शासकीय जमिनीची मागणी होती, याबाबत पालकमंत्री कु.आदिती तटकरे यांनी संबंधितांना आवश्यक ती कार्यवाही करण्याचे निर्देश दिले होते.

   त्यानुसार मौजे गौळवाडी, ता.कर्जत, जि.रायगड येथील स.नं.120/0, क्षेत्र 0-92-0 हे.आर.या गुरचरण ग्रामपंचायत पोटल यांच्याकडे निहीत असलेल्या शासकीय जमिनीपैकी 0-20-00 हे.आर.क्षेत्र इतकी जमीन महसूल मुक्त किंमतीने व सारामाफीने कब्जाहक्काने जिल्हा पशुसंवर्धन अधिकारी, जिल्हा परिषद, रायगड-अलिबाग यांच्याकडे पशुवैद्यकीय दवाखाना श्रेणी-1 वैजनाथ करिता हस्तांतरीत करण्याचे आदेश जिल्हाधिकारी डॉ.महेंद्र कल्याणकर यांनी नुकतेच जारी केले आहेत.

  कर्जत तालुक्यातील ग्रामीण भागातील जनतेला पशुवैद्यकीय सुविधा मिळण्याच्या दृष्टीने हा लोकोपयोगी निर्णय घेण्यात आला आहे. 

0000000