म्हसळा तालुक्यातील विविध तलाठी कार्यालयांकरिता जागा हस्तांतरित
अलिबाग,
जि.रायगड दि.17 (जिमाका) :- तलाठी
कार्यालय हे नागरिकांसाठी ग्रामीण स्तरावरील अत्यंत महत्त्वाचे कार्यालय मानले जाते.
या कार्यालयातून जनतेची महसूलविषयक सर्व प्रकारची महत्त्वाची कामे केली जातात.
ग्रामीण भागातील जनतेची महसूलविषयक कामे
सुलभ व्हावीत, प्रशासन गतिमान व्हावे तसेच येथील अधिकारी- कर्मचाऱ्यांच्या व या कार्यालयात
विविध कामांसाठी येणाऱ्या नागरिकांच्या दृष्टीने या तलाठी कार्यालयाची इमारत सुसज्ज
व अद्ययावत असणे, ही काळाची गरज होती, या दृष्टीने पालकमंत्री या नात्याने कु.आदिती
तटकरे यांनी व्यक्तिशः लक्ष देण्यास सुरुवात केली.
या पार्श्वभूमीवर लिपणी, वरवटणे, खरसई या तलाठी
कार्यालयांच्या इमारतींच्या बांधकामासाठी जमिनीची मागणी केली होती. याबाबत पालकमंत्री
कु.आदिती तटकरे यांनी संबंधितांना आवश्यक ती
कार्यवाही करण्याचे निर्देश दिले होते.
त्यानुसार लिपणी येथील तलाठी कार्यालय, वावेसाठी
क्षेत्र 0.03.0 हे.आर., वरवटणे येथील तलाठी सजा, वरवटणेसाठी क्षेत्र 0.03.0 हे.आर.,
खरसई येथील तलाठी सजा, मेंदडीसाठी क्षेत्र 0.03.0 हे.आर., ही जमीन महसूल मुक्त व सारामाफीने
संबधित तलाठी कार्यालयाच्या इमारतीच्या बांधकामासाठी पालकमंत्री कु.आदिती तटकरे यांच्या
निर्देशानुसार हस्तांतरीत करण्याचे आदेश जिल्हाधिकारी डॉ.महेंद्र कल्याणकर यांनी जारी
केले आहेत.
यामुळे खऱ्या अर्थाने महसूल प्रशासन गतिमान होऊन जनतेला महसूल विषयक सोयी सुविधा
सुलभतेने मिळतील. विविध प्रशासकीय कार्यालयांच्या नव्या इमारतीसाठी व अद्ययावतीकरणासाठी
पालकमंत्री कु.आदिती तटकरे करीत असलेल्या पाठपुराव्यामुळे प्रशासन निश्चितच गतिमान
होण्यास मोठा हातभार लागणार आहे.
000000
Comments
Post a Comment