दिव्यांग व्यक्तींनी महा-शरद (MAHA-SHARAD) वेब पोर्टलवर नोंदणी करण्याचे आवाहन - मुख्य कार्यकारी अधिकारी डॉ.किरण पाटील
अलिबाग, दि.23 (जिमाका):- दिव्यांग व्यक्ती हक्क अधिनियम, 2016 मधील कलम 2 (झेडसी) अन्वये दिलेल्या
परिशिष्टामध्ये दिव्यांगत्त्वाचे 21 प्रकार आहेत. दिव्यांग व्यक्तींना त्यांचे जीवन
जगणे सुलभ व्हावे, यासाठी विविध सहाय्यक उपकरणांची आवश्यकता असते. जेणेकरून ते त्यांच्या
दिव्यांगत्वावर मात करू शकतील व जनसामान्यांप्रमाणे जीवन जगू शकतील. त्यांना दिव्यांगत्वावर
मात करण्यासाठी कोणत्या सहाय्यक उपकरणांची आवश्यकता आहे, हे जाणून घेण्यासाठी आवश्यक
ती वैद्यकीय चाचणी करून घेणे व त्या आधारे सहाय्यक उपकरणे निश्चित करणे आवश्यक असते.
समाजातील दानशूर व्यक्ती, सामाजिक व सेवाभावी संघटना या दिव्यांगांना
सुगम्यता प्राप्त करून देण्यासाठी आवश्यक सहाय्यक साधनांचा पुरवठा करू इच्छितात. त्यासाठी
दानशूर व्यक्ती व दिव्यांग लाभार्थी यांच्यामध्ये दुवा साधला जाण्यासाठी तसेच दिव्यांग
व्यक्तींमध्ये जनजागृती करून त्यांची माहिती उपलब्ध करण्याच्या उद्देशाने सामाजिक न्याय
व विशेष न्याय विभागाने "महा-शरद वेब पोर्टल" वर नोंदणी करण्याचे अभियान
सुरू केलेले आहे.
याकरिता दिव्यांग व्यक्ती तसेच दिव्यांग व्यक्तींना सहाय्य करू इच्छिणाऱ्या
दानशूर व्यक्ती, सामाजिक व सेवाभावी संघटनांची नोंदणी www.mahasharad.in या संकेतस्थळावर नोंदणी करणे
गरजेचे आहे. याकरिता दिव्यांग व्यक्तींकडे केंद्र शासनाच्या वैश्विक ओळखपत्र प्रणालीअंतर्गत
(UDID | Card) असणे आवश्यक आहे. तसेच त्या व्यक्ती आणि सामाजिक सेवाभावी संस्थाकडून
या प्रणालीव्दारे मदत करण्यात येईल, त्यांना आयकरामध्ये 80-जी अंतर्गत सूट असेल.
तरी जास्तीत जास्त दिव्यांग व्यक्ती व दानशूर व्यक्ती आणि सामाजिक सेवाभावी
संस्थांनी www.mahasharad.in या संकेतस्थळावर
नोंदणी करावी, असे आवाहन जिल्हा परिषद मुख्य कार्यकारी अधिकारी डॉ.किरण पाटील
यांनी केले आहे.
00000
Comments
Post a Comment