जिल्हा उपनिबंधक डॉ.सोपान शिंदे यांनी सहकारी संस्थांच्या लेखापरीक्षक नियुक्तीबाबत घेतला आढावा
अलिबाग,दि.29 (जिमाका):- जिल्हा उपनिबंधक डॉ.सोपान शिंदे यांनी दि.26 मार्च 2022
रोजी तालुका सहाय्यक निबंधक व तालुका लेखापरीक्षक यांची माहे फेब्रुवारी 2022
अखेरचे सन 2020-21 या कालावधीचे जिल्ह्यातील सहकारी संस्थांचे वैधानिक लेखापरीक्षण
पूर्ण करणे आणि सन 2021-22 या कालावधीचे लेखापरीक्षणासाठी लेखापरीक्षकाची ठरावाने नियुक्ती
या विषयाबाबत आढावा घेतला.
या सभेमध्ये तालुकानिहाय माहिती
नुसार एकूण लेखापरीक्षण करावयाच्या ठरावाने 2 हजार 235 व परंतुकान्वये 3 हजार 397 अशा
एकूण 5 हजार 632 संस्थांपैकी माहे फेब्रुवारी 2022 अखेर ठरावान्वये 1 हजार 919 संस्था
व परंतुकान्वये 873 संस्था अशा एकूण 2 हजार 792 संस्थांचे वैधानिक लेखापरीक्षण पूर्ण
झालेले असून उर्वरीत शिल्लक पैकी ठरावान्वये 316 व परंतुकान्वये 2 हजार 524 अशा एकूण
2 हजार 840 संस्थांचे वैधानिक लेखापरीक्षण पूर्ण झाले नसल्याचे निदर्शनास आले.
तसेच सन 2021-2022 या कालावधीचे
वैधानिक लेखापरीक्षणासाठी दि.31 मार्च 2021 अखेरच्या अपेंडिक्सप्रमाणे लेखापरीक्षणास
पात्र असलेल्या एकूण 5 हजार 946 संस्थापैकी फक्त 762 संस्थांनीच लेखापरीक्षकांची ठरावाने
नियुक्ती केली असून उर्वरीत एकूण 5 हजार 184 संस्थांनी लेखापरीक्षकाची नियुक्ती करणे
बाकी असल्याचे निदर्शनास आले.
जिल्ह्यातील सर्व सहकारी संस्थांनी
दि.31 मार्च 2022 अखेर सन 2020-21 वैधानिक लेखापरीक्षण 100 टक्के पूर्ण करून घ्यावे.
सन 2021-22 या कालावधीचे लेखापरीक्षण करण्यासाठी लेखापरीक्षकांच्या ठरावाने नियुक्त्या
करण्याची मुदत दि.31 मार्च 2022 पर्यंत असल्याने संस्थेने वार्षिक सर्वसाधारण सभा किंवा
संचालक मंडळ सभेमध्ये निबंधकाच्या नामतालिकेवरील पात्र लेखापरीक्षकाची नियुक्ती करून
याबाबतचा ठराव व लेखापरीक्षकाचे संमतीपत्र दि.04 एप्रिल 2022 पर्यंत तालुका सहाय्यक
निबंधक व तालुका लेखापरीक्षक कार्यालयाकडे दाखल करावेत, असे आवाहन केले आहे.
महाराष्ट्र सहकारी संस्था अधिनियम
1960 चे कलम 75(2 अ) व कलम 81 अन्वये सहकारी संस्थान दरवर्षी वैधानिक लेखापरीक्षण पूर्ण
करवून घेणे अनिवार्य आहे. यात कसूर झाल्यास संबंधित संस्थेविरूध्द अपात्रतेची दंडात्मक
कारवाई करण्याची तरतूद आहे.
तरी ज्याचे सन 2020-21 या कालावधीचे
लेखापरीक्षण पूर्ण झाले नाही, अशा संस्था अवसायनात घेणे तसेच सन 2021-22 या कालावधीचे
लेखापरीक्षण करण्यासाठी संस्थांनी ठरावान्वये लेखापरीक्षकाची नियुक्ती न केलेल्या संस्थांची
परंतुकान्वये लेखापरीक्षक नियुक्ती करण्यात येईल याची नोंद घ्यावी, असे आवाहन सर्व
सहकारी संस्थांना जिल्हा उपनिबंधक डॉ.सोपान शिंदे यांनी केले आहे.
00000
Comments
Post a Comment