48 व्या कोकण परिक्षेत्रीय पोलीस क्रीडा स्पर्धेचे महिला व बालविकास मंत्री कु.आदिती तटकरे यांचे हस्ते उद्घाटन संपन्न
रायगड दि.22(जिमाका) :- रायगड पोलीस विभागातर्फे सरखेल कान्होजी आंग्रे क्रीडा नगरी, पोलीस मुख्यालय अलिबाग येथे आयोजित 48 वी कोकण परिक्षेत्रीय पोलीस क्रीडा स्पर्धा-2023 स्पर्धेचे उद्घाटन महिला व बालविकास मंत्री कु.आदिती तटकरे यांच्याहस्ते ज्योत पेटवून व हवेत फुगे उडवून उद्घाटन संपन्न झाले.
यावेळी जिल्हाधिकारी डॉ.योगेश म्हसे, जिल्हा परिषदेचे मुख्य कार्यकारी अधिकारी डॉ.भरत बास्टेवाड, जिल्हा पोलीस अधीक्षक सोमनाथ घार्गे, पोलीस उपायुक्त वाहतूक शाखा नवी मुंबई श्री.काकडे, अपर पोलीस अधीक्षक अतुल झेंडे, उप वनसंरक्षक राहुल पाटील आदींसह पोलीस विभागाचे अधिकारी, कर्मचारी यावेळी उपस्थित होते.
यावेळी महिला व बालविकास मंत्री कु.आदिती तटकरे म्हणाल्या की, 48 वी कोकण परिक्षेत्रीय पोलीस क्रीडा स्पर्धा-2023 रायगड जिल्ह्यामध्ये संपन्न होत असून रायगडकरांसाठी ही अभिमानाची गोष्ट आहे. पोलीस विभागाचे क्रीडा क्षेत्राशी अतुट व जिव्हाळयाचे नाते आहे. पुढील काळात अधिकाधिक चांगले खेळाडू तयार होवून पोलीस विभागाचे नाव उंचवावे. पोलीस विभागातील अधिकारी, कर्मचाऱ्यांना वर्षांचे बारा महिने कार्यरत राहावे लागते. तसेच पोलीस विभागात महिलांचा सहभाग मोठ्या प्रमाणात असून त्यांना आपल्या घरातील सर्व जबाबदाऱ्या सांभाळून आपली कर्तव्य पार पाडावी लागतात. या तीन दिवसीय पोलीस क्रीडा स्पर्धेत पालघर, ठाणे, नवी मुंबई, रायगड, रत्नागिरी, सिंधुदूर्ग जिल्ह्यातील ज्यांनी ज्यांनी सहभाग घेतला आहे त्यांचे व पोलीस विभागाचे अभिनंदन करते. कार्यक्रमाच्या शेवटी स्पर्धेसाठी आलेल्या सर्व खेळाडूंना गोपनीयतेची शपथ देण्यात आली.
कार्यक्रमाच्या प्रास्ताविकात जिल्हा पोलीस अधीक्षक सोमनाथ घार्गे यांनी पोलीस क्रीडा स्पर्धा-2023 स्पर्धेच्या आयोजन विषयीची माहिती विषद करुन सांगितली. तर कार्यक्रमाचे आभार प्रदर्शन अपर पोलीस अधीक्षक अतुल झेंडे यांनी मानले.
००००००००
Comments
Post a Comment