जागतिक कौशल्य स्पर्धेत सहभागी होण्यासाठी जिल्ह्यातील युवक-युवतींनी नोंदणी करावी
रायगड(जिमाका)दि.02 :- जागतिक कौशल्य स्पर्धा सन 2024, फ्रान्स (ल्योन) येथे होणार असून या स्पर्धेमध्ये भारतातील प्रतिभासंपन्न व कुशल उमेदवारांचे नामांकन करण्याच्या दृष्टीने जिल्ह्यातील युवक-युवतींना विविध 52 क्षेत्रामध्ये होणाऱ्या स्पर्धेमध्ये सहभागी होण्यासाठी महास्वयं वेबपोर्टलवर नोंदणी करावी, असे आवाहन कौशल्य विकास रोजगार व उद्योजकता विभागाच्या सहायक आयुक्त श्रीम. अ.मु.पवार यांनी केले आहे.
जागतिक कौशल्य स्पर्धा सन 2024, फ्रान्स (ल्योन) येथे होणार असून याकरिता जिल्हा, विभाग, राज्य आणि देशस्तरावर स्पर्धा घेतली जाणार असून याद्वारे गुणवान कौशल्य धारक पात्र स्पर्धक निवडले जाणार आहेत. ही स्पर्धा दर दोन वर्षांनी होते आणि ही जगातील सर्वांत मोठी व्यवसायिक शिक्षण आणि कौशल्य उत्कृष्ठता स्पर्धा असून जगभरातील 23 वर्षाखालील तरुणांकरिता त्यांच्यातील कौशल्य सादर करण्याची ही स्पर्धा ऑलम्पिक खेळासारखीच आहे.
यापूर्वी 46 जागतिक कौशल्य स्पर्धेमध्ये 62 सेक्टर मधून 50 देशातील 10 हजार उमेदवार समाविष्ट असून ही स्पर्धा 15 देशात 12 आठवड्यासाठी आयोजित करण्यात आली होती. या पुढील जागतिक कौशल्य 2024 मध्ये फ्रान्स (ल्योन) येथे आयोजित होणार आहे. जागतिक कौशल्य स्पर्धा 2024 करिता वयोमर्यादा हा एकमेव निकष ठरविण्यात आलेला आहे. या स्पर्धेमध्ये सहभागी होण्यासाठी उमेदवाराचा जन्म दि. 01 जानेवारी, 2002 किंवा तदनंतरचा असावा. तसेच आडेटीव्ह मॅन्युफॅक्चरिंग, क्लाऊड कम्प्युटिंग, सायबर सिक्युरिटी, डिजिटल कन्स्ट्रक्शन, इंडस्ट्रियल डिझाईन टेक्नॉलॉजी, इंडस्ट्री 4.0, इन्फॉर्मेशन नेटवर्क केबलिंग, मेकॅट्रॉनिक्स आणि रोबोट इंटिग्रेशन वॉटर टेक्नॉलॉजी या क्षेत्राकरिता उमेदवाराचा जन्म दिनांक 1 जानेवारी, 1999 किंवा तदनंतरचा असणे अनिवार्य आहे.
फ्रान्स (ल्योन) येथे आयोजित जागतिक कौशल्य स्पर्धा 2024 साठी जिल्हा, विभाग, राज्य, आणि देश पातळीवरून प्रतिभासंपन्न, कुशल उमेदवारांचे नामांकन करण्याच्या दृष्टीने आयोजित स्पर्धेकरिता सर्व शासकीय आणि खाजगी औद्योगिक प्रशिक्षण संस्था, एमएसएमई टूल रूम्स, सिपेट, आयआयटी, अभियांत्रिकी महाविद्यालयॆ, तंत्रनिकेतन विद्यालयॆ, आयएचएम/हॉस्पिटॆलिटी इन्स्टिट्यूट, कॉर्पोरेट टेक्निकल इन्स्टिट्यूट, स्किल ट्रेनिंग इन्स्टिट्यूट, महाराष्ट्र राज्य कौशल्य विद्यापीठ, एमएसबीव्हीटी, खाजगी कौशल्य विद्यापीठ, इन्स्टिट्यूट ऑफ ज्वेलरी मेकिंग, इतर सर्व प्रशिक्षण संस्था, कला वाणिज्य विज्ञान शाखेची कनिष्ठ व वरिष्ठ महाविद्यालय तसेच महाराष्ट्र राज्य कौशल्य विकास सोसायटीकडे अधिनिस्त सर्व व्यावसायिक कौशल्य प्रशिक्षण संस्था विविध व्यवसायिक आस्थापना आणि कारखाने यांच्याकडील विहित वयोमर्यादेतील इच्छुक प्रतिभासंपन्न व कुशल उमेदवारांचे नामांकन या स्पर्धेसाठी करता येईल. तसेच, या स्पर्धेत निवड झालेल्या उमेदवारांना वेळोवेळी लागणारे मार्गदर्शन व सहाय्य महाराष्ट्र राज्य कौशल्य विकास सोसायटी, मुंबई यांच्याकडून करण्यात येईल. यासाठी सहभाग घेण्यास इच्छुक असलेल्या पात्र उमेदवारांनी www.skillindiadigital.gov.in या लिंकवर भेट देऊन World Skill Competition Registration या लिंकवर भेट देवून दि. 07 जानेवारी 2024 पर्यंत जास्तीत जास्त नाव नोंदणी करून आपला सहभाग निश्चित करावा.
00000000
Comments
Post a Comment