खरीप पणन हंगाम 2023-24 मध्ये शेतकऱ्यांकडून खरेदी करण्याकरीता दि.31 मार्च पर्यंत मुदतवाढ

रायगड,दि.05(जिमाका):- पणन हंगाम 2023-24 मध्ये किमान आधारभूत खरेदी योजनेंतर्गत धान व भरडधान्य खरेदी करीता दि.29 फेब्रुवारी 2024 अखेरपर्यंत मुदत देण्यात आली होती. मागील हंगामाच्या तुलनेत राज्यात आतापर्यंत धान खरेदी अल्प धान प्रमाणात झाले असल्याचे शासनाच्या निदर्शनास आले असल्याने खरीप पणन हंगाम 2023-24 मध्ये शेतकऱ्यांकडून खरेदी करण्याकरीता दि.31 मार्च 2024 पर्यंत मुदतवाढ देण्यात आली असून शेतकऱ्यांनी याचा लाभ घ्यावा, असे जिल्हा पुरवठा अधिकारी, सर्जेराव सोनवणे यांनी आवाहन केले आहे. किमान आधारभूत किंमत खरेदी योजना ही केंद्र शासनाची योजना असून शेतकऱ्यांना हमी भावापेक्षा कमी किंमतीने धान्य विकावे लागू नये, म्हणून ही योजना राबविण्यात येते. हंगाम 2016-2017 पासून विकेंद्रीत खरेदी योजना संपूर्ण राज्यात राबविण्याचा निर्णय राज्य शासनाने घेतला आहे. आधारभूत किंमतीचा शेतकऱ्यांना लाभ होण्याच्या दृष्टीने व त्यांना हमी भावापेक्षा कमी किंमतीने धान्य विकावे लागू नये, यासाठी राज्य शासनाने शेतकऱ्यांना लाभ मिळावा, या हेतूने राज्यात खरेदी केंद्र सुरु केली आहेत. 0000000