जात प्रमाणपत्र पडताळणीसाठी राज्यात विशेष मोहिम मागासवर्गीय विद्यार्थ्यांना अर्ज दाखले करण्याचे आवाहन

 

रायगड (जिमाका) दि.15:- सामाजिक न्याय व विशेष  सहाय्य विभागामार्फत भारतरत्न डॉ.बाबासाहेब आंबेडकर यांच्या जयंतीचे औचित्य साधून राज्यात दि.10 ते दि. 25 एप्रिल 2024 या कालावधीत समता पंधरवडयात जात प्रमाणपत्र पडताळणीसाठी विशेष मोहिम सुरु करण्यात आली आहे. 

इ.11 वी व इ. 12 वी विज्ञान शाखेत शिक्षण घेत असलेल्या, तसेच अभियांत्रिकी पदविका शिक्षण घेत असलेल्या व पुढील उच्च शिक्षणाकरिता व्यावसायिक अभ्यासक्रमास प्रवेश घेऊ इच्छित मागासवर्गीय विद्यार्थ्यांना जात वैधता प्रमाणपत्र मिळावे. जात वैधता प्रमाणपत्राअभावी मागासवर्गीय विद्यार्थी व्यावसायिक अभ्यासक्रमास प्रवेश घेण्यापासून वंचित राहू नये, याकरिता विशेष मोहिम राबविण्यात येत आहे.

     ज्या मागासवर्गीय विद्यार्थ्यांनी अद्याप जात वैधता प्रमाणपत्र मिळणेसाठी त्वरीत अर्ज सादर करावेत.  ज्या विद्यार्थ्यांनी अर्ज सादर केले आहेत, परंतु अद्याप वैधता प्रमाणपत्र मिळाले नाही. अशा विद्यार्थ्यांनी दि.22  ते 26 एप्रिल 2024 या कालावधीत समिती कार्यालयात हजर राहून त्रुटींची पूर्तता करावी.

 वेळेत वैधता प्रमाणपत्र देण्यासाठी समितीस पुरेसा अवधी मिळावा. तसेच वेळेत जात वैधता प्रमाणपत्र न मिळाल्याने  प्रवेशापासून वंचित राहण्याची परिस्थिती उद्भवते. मागासवर्गीय विद्यार्थ्यांवर असा बिकट प्रसंग येऊ नये.  यास्तव ही मोहिम राबविण्यात येत आहे असे आवाहन उपायुक्त तथा सदस्य,जिल्हा जात पडताळणी  समिती, रायगड-अलिबाग विशाल नाईक यांनी केले आहे.

00000