मागासवर्गीय मुलींचे शासकीय वसतिगृहात मोफत प्रवेशाकरिता अर्ज सादर करावेत

 

रायगड(जिमाका)दि.27:- शासनाच्या सामाजिक न्याय विभागांतर्गत मागासवर्गीय मुलींचे शासकीय वसतिगृह, सेक्टर 10, प्लॉट नंबर 21 ग्रीन पार्क सोसायटी समोर कळंबोली, पनवेल येथे कार्यरत आहे.  या मागासवर्गीय मुलींचे शासकीय वसतिगृहात सन 2025-26 या शैक्षणिक वर्षातकरिता मोफत प्रवेश देण्यात येणार असून इच्छूक विद्यार्थींनींनी अर्ज सादर करावेत, असे आवाहन गृहपाल, मागासवर्गीय मुलींचे शासकीय वसतिगृह, पनवेल श्रीमती उषा शशिकांत गुजेला यांनी केले आहे.

     या शासकीय वसतिगृहात  इ.8 वी पासून गरीब, हुशार, होतकरु, मागासवर्गीय अनु.जाती, अनु. जमाती, विमुक्त जाती, भटक्या जमाती, इतर मागासवर्गीय, विशेष मागास प्रर्वग, आर्थिकदृष्टया मागास, अनाथ व अपंग  गुणवत्तेनुसार प्रवेश दिला जातो. वसतिगृहात विद्यार्थीनींकरिता मोफत निवासव्यवस्था असून नाष्टा-दररोज पोहे/ शिरा/उपीट इ. पैकी एक, उकडलेली दोन अंडी, सफरचंद, ऋतुमानानुसार एक फळ व दूध तसेच भोजन व्यवस्थेमध्ये जेवण ( डाळ, भात, चपाती, भाजी/ उसळ, लोणचे, पापड इ.सह आठवडयातून दोन वेळा मासांहार ) देण्यात येते.

               अभ्यासाकरिता लागणारी वहया, पुस्तके, शैक्षणिक व लेखन साहित्य देखील विनामुल्य पुरविले जाते. तसेच दैनंदिन व वैयक्तिक खर्चाकरिता म्हणून रु. 600/- निर्वाहभत्ता दिला जातो. शालेय व गणवेष पात्र महा. विदयार्थिनींना दोन संचाकरिता गणवेष भत्ता/रेनकोट/छत्री भत्ता दिला जातो. या व्यतिरिक्त संगणक, ग्रंथालय सुविधा, क्रिडासाहित्य, मनोरंजन इ. अनेक सुविधा उपलब्ध आहेत.

               प्रवेशपात्र विद्यार्थीनींच्या पालकांचे सर्व मार्गानी वार्षिक उत्पन्न अनु.जाती, अनु.जमाती विद्यार्थींनींकरिता रुपये 2 लाख 50 हजार चे आत व विमुक्त जाती, भटक्या जमाती, इतर मागासवर्गीय, विशेष मागास प्रर्वग  विद्यार्थीनींकरिता रुपये 1 लाखाचे आत असावे.

              ऑनलाईन प्रवेश अर्जासोबत तहसिलदार यांचे सहीचा सन 2025-26 मधील उत्पन्नाचा दाखला, जातीचे मुलकी अधिकाऱ्यांचे प्रमाणपत्र, मागील इयत्ता पास झाल्याचे गुणपत्र, आधारकार्ड या  आवश्यक असलेल्या कागदपत्रांच्या सत्यप्रती जोडणे आवश्यक आहेत.

              सन-2025-26 या शैक्षणिक वर्षाकरिता वसतिगृह प्रवेश अर्ज हे वसतिगृहात उपलब्ध करण्यात आलेले आहेत.        अधिक माहितीकरिता गृहपाल श्रीमती उषा शशिकांत गुजेला (गृहपाल) (दू.क्र. 8767339974) यांच्याशी कार्यालयीन वेळेत संपर्क साधावा.

००००००